ما تريد معرفته عن معهد المراقبين الفنيين في سوريا
ما تريد معرفته عن معهد المراقبين الفنيين في سوريا
ما تريد معرفته عن معهد المراقبين الفنيين في سوريا
قبل ما احكي أي شي بخصوصه ،حابب قلكن إنو هاد المعهد هو بصيص الأمل للي كان بيحلم بالمعمارية أو المدنية.
طبعاً هاد المعهد هو و المعهد الهندسي أخوات، و الاختصاصات تقريباً نفسها، مدته سنتين حصراً لطلاب حملة الشهادة الثانوية العلمي.
بتتخرج منو كمراقب فني عندك خبرة كافية لتكون مساعد مهندس
الحلو بالموضوع إنو ال3% الأوائل من كل اختصاص بروحوا على الكليات الجامعية يلي بتتوافق مع اختصاصهن
طبعاً الاختصاصات بتختلف من محافظة لمحافظة و يلي بدمشق 3 اختصاصات (هندسة مواصلات – محطات معالجة – تصميم داخلي)
و هلق لنبلش نحكي شوي عن هدول الاختصاصات
اختصاص النقل و المواصلات :
كتير مهم و مطلوب، بيتعلق بكل شي مواصلات طيران بر بحر سيارات قطارات شوارع مرافق عامة..إلخ ، كتير شامل و عميق ، بيدخلك بالعمل الهندسي الطرقي متل تنفيذ أعمال الطرق الجسور والأنفاق والمشاركة في إعداد المخططات التنفيذية والرسوم التفصيلية وحساب الكميات وتنظيم الكشوف بأنواعها ؛ الخبر الحلو إنو خريج هاد الاختصاص أكتر شي مطلوب بسوق العمل و غالباً بيعتمدوا عليه
إن كان بالقطاع الحكومي أو الخاص أو حتى برا القطر.
●بلنسبة للمقررات:
السنة الأولى :
ميكانيك تربة — مقاومة مواد — مواد البناء — الرسم الهندسي — المعلوماتية — طرق 1 — المساحة 1 — هندسة المرور ، اللغة العربية — الثقافة القومية — انكليزي 1 — الرياضيات — انكليزي 2 — بيتون .
السنة الثانية :
معلوماتية تخصصية — طرق 2 — المساحة 2 — تكنولوجيا الإنشاءات — حساب الكميات — السكك الحديدية — الرسم المدني — المشروع ، انكليزي 3 — منشآت هندسية — الجسور — المطارات والموانئ .
إجينا لاختصاص الصايعين الضايعين الهندسة الصحية و محطات المعالجة:
برأيي تسأل أي طالب مدنية و اذكرله اسم الفرع بتلاقيه زهزه و انبسط على قد ما بتستمتع بالدراسات المائية
المهم ما علينا ، بيعتبر من الاختصاصات الحديثة، ظهر نظراً للعدد الوافر من محطات المعالجة و يلي عم تشتغل الحكومة على تنفيذها ،فرص العمل لخريجين هاد الاختصاص كتير منيحة جوا البلد و خارجها متل الخليج مثلاً ،و متل ما منعرف إنو منطقة صحراوية ف كمان ابتدت تدرس مشاريع محطات المعالجة للحفاظ على المياه و هون بيجي دور اليد العاملة يلي هنن خريجين هاد الاختصاص
و المقررات هي :
السنة الأولى : اللغة الأجنبية ، اللغة العربية ، الثقافة القومية ، الرياضيات ، الميكروبيولوجيا ، مقاومة المواد ، مواد البناء ، الرسم الهندسي– اللغة الأجنبية 2 ، الهيدرولوجيا ، المعلوماتية ، الهيدروليك ، تحليل المياه ، الرسم الصحي
السنة الثانية : المعلوماتية التخصصية — الإمداد بالمياه — تمديدات داخلية — منشآت مائية — محطات معالجة– البيتون — حساب الكميات — المساحة — محطات المعالجة 2 — انكليزي 3 — فضلات صلبة — الصرف الصحي — محطات الضخ .
اختصاص التصميم الداخلي (التصميم المعماري):
هاد الاختصاص بيجمع بين هندسة العمارة و الفنون الجميلة ليطلع معنا من هاد المزيج إبداع لا متناهي
اي و بعدين..يعني لما اتخرج شو بساوي بحياتي؟!
لما تتخرج فيك تشتغل بالمكاتب الهندسية و بمكاتب التصميم الداخلي، شي فخامة يعني، طبعاً قبل ما تدخل هالاختصاص في عندك امتحان قبول بتحدده إدارة المعهد ،
●بلنسبة لمواده :
السنة الأولى :
عمارة داخلية 1 — رسم هندسي1 — ظل ومنظور 1 — تقنية و مواد — عمارة داخلية 2 — رسم هندسي 2 –ظل ومنظور 2 — معلوماتية تخصصية ، اللغة العربية — الثقافة القومية — انكليزي 1/فرنسي1 — المعلوماتية — انكليزي 2 — علم الجمال والإبداع الفني — الألوان والظواهر البصرية .
السنة الثانية :
التصميم بمعونة الحاسب 1 — الرسم 3 — نماذج 1 — عمارة داخلية 3 — التصميم بمعونة الحاسب 2 — نماذج 2 — عمارة داخلية 4 — حساب الكميات
انكليزي 3 — تاريخ فن وعمارة — طرز معمارية — فيزياء البناء — الصوت والضوء .
بالنهاية معهد كتير حلو، دراسته ممتعة و غالباً مجموعه حلو
