ملاحظات ونصائح مهمه لخريجي الاعدادي في التقديم الالكتروني للجامعات العراقية

1- دير بالك تستعجل بالتقديم على الاستمارة وتتندم بعدين ، ترى يحقلك تقدم مرة وتعدل مرة ( يعني عندك محاولتين للتقديم فقط ) فدير بالك تستعجل بالتقديم دير بالك لأنه إذا قدمت وخلصت المحاولتين وصار خطأ بسيط راح تضطر تداوم كلية متريدها او تكعد سنة بالبيت تنتظر تقدم على السنة الجاية ( بنظام اعادة الترشيح ).

2- اكو هواية امور مهمة لازم تعرفها قبل لا تقدم اللي من ضمنها #انظمة_التدريس بين الكليات ، لأنه اذا قدمت محافظات ونقبلت بكلية خارج محافظتك ونظام هاي الكلية يختلف عن أي نظام الكلية اللي بمحافظتك هنا ميصير تنقل بينهم ، واذا نقلت يرجعونك للمرحلة الأولى.

– مثلا قدمت هندسة مدني بغداد ( نظامها مقررات ) ونقبلت بيها وانت من البصرة فلازم تداوم سنة كاملة بغداد وتنجح يلا يحقلك تنقل لمحافظتك ( يعني من شروط النقل انك تداوم سنة بالجامعة اللي تنقبل بيها اول مرة) اللي هي بغداد ، المهم خلصت مرحلة أولى وتريد ترجع لمحافظتك تدرس وبالبصرة هندسة مدني نظامها (فصلي مثلا) فإنت بهاي الحالة ما تكدر تنقل بينهم ، لأن نظام الكليتين يختلف ، فبهاي الحالة لو تستمر بغداد لو تنقل للبصرة بس ترجع مرحلة أولى من الصفر.لذلك ادرس وضعك زين يلا تقرر وترتب استمارتك.

3- معدلات القبول راح تكون قريبة من الحدود الدنيا للعام السابق 2023 , وخلي ببالك انه ممكن تكون معدلات القبول أعلى بقليل أو اقل بقليل او متقاربة من سنة من العام وهذا يعتمد على خطة القبول المركزية وعدد الطلاب اللي تريدهم بكل كلية.

4- للفرع العلمي مطلوب انك تملي 50 اختيار داخل الاستمارة ويكون على الأقل مخلي بيهم 10 معاهد ( اجباري تخلي اقل شي 10 معاهد ). اما الفرع الادبي فمطلوب منك تختار 25 اختيار كحد أدنى الى 50 اختيار وايضًا لازم تخلي 10 معاهد ضمن استمارة التقديم.

5- من تجي تختار الاختيارات يجب الالتزام بما يلي :

• تختار الكليات اللي قريبة من معدلك وتناسب وياه ( اعلى منه ب3-5 درجات او مقاربه أو أقل منه ).

مو معدلك 70 وتروح تخلي علم الذرة او طب عام !!؟ يعني اختار اشياء قريبة من معدلك ومعقولة.

• رتب اختياراتك حسب رغبتك ! يعني أي اختصاص تريده اكثر شي ؟ تخلي أول اختيار ، ثم لا سامح الله اذا ماطلعلك اختيارك الأول ف تسأل نفسك ؟ اني أي اختصاص احب اذا ما طلعلي الأول ؟ ف تختار و تخلي بالخيار الثاني وهكذا … ( حسب رغبتك رتبهم).

– مثلا انت تحب هندسة اتصالات وهي قريبة تقريبا من معدلك ( حتلو لو اعلى بكم درجة اثنين أو ثلاثة مثلا ) فخليها أول اختيار .

– تبدي تتوقع اسوء الاحتمالات ، أنه اذا ما نقبلت اتصالات ، شنو الاختصاصات اللي تريده بعدها ؟ مثلا هندسة حاسبات ، ف تختار بالخيار الثاني حاسبات.

– ثم هم تتوقع اسوء الاحتمالات ، أنه اني اذا ما نقبلت لا اتصالات ولا حاسبات ، شنو بعد اريد ؟ ف تخلي ثالثا وهكذا ترتيب الاستمارة واضح ؟

• لا تخلي اختيار ما تريده وممكن يقبلك ! لأنه كلشي يصير ! فلا تخلي اختصاصات انت ماتريد تدرس بيها بالاستمارة ، واضح ؟ خلي شي يناسبك

– يعني مثلا اني ما أحب ادرس صيدلة ، ف ما اخلي صيدلة اصلا لأنه يجوز تطلعلك وبعدين اجباري تدرس بيها أو تترك سنة كاملة وتنتظر ينفتح التقديم سنة الخ !.

1- إذا قدمت أول شخص على الاستمارة او آخر شخص فهذا مايفيدك بشي ، فخاف عبالك اذا قدمت اول واحد يعني حجزت مقعد.

2- الاستمارة راح تبقى مفتوحة لوقت طويل فلا تستعجل ابد.

3- طلاب الدور الثاني ماجل ماده مادتين عادي تريد تقدم او لا لحد ماتخلصون امتحانات وتطلع نتائجكم لأنه من تطلع نتائجكم راح يفتحوها مرة ثانية وتقدم براحتك فلا تهتم لان كل سنة هيج.

4- بعد ماتقرا الملاحظات اللي كتبتها الك فوك وتفكر وتسأل وتستفسر وتبحث ..الخ ف تجيبلك مسودة وترتب خياراتك بيها وتتاكد منها وبعدين

5- من تريد تعرف معلومات عن اختصاص معين فلا تعتمد على معلومات النت فقط ، الأفضل تروح تسأل أهل الاختصاص والطلاب اللي يداومون بالكلية اللي أنت تريد تعرف معلومات عنها.

6- تذكر زين أنه عندك محاولتين للتقديم فقط من تخلصهم خلاص بعد ماتكدر تغير الاختيارات الا تنتظر سنة وتكعد بالبيت لذلك ابد لا تستعجل عندك وقت هواية للتفكير والقرار.